Британската актерка Дајан Лангтон, најпозната по улогата во серијта „Сплетки“, почина на 77-годишна возраст. Веста ја потврди нејзиниот портпарол Шејн Колинс во објава на Икс.

„Жал ми е што морам да кажам дека Дајан почина утрово. Таа имаше богата и единствена кариера појавувајќи се на сцената, во филмови и ТВ серии“, напиша тој.

Во врска со тажната вест се огласија и од серијата „Сплетки“: „Тажни сме и шокирани од веста за неочекуваната смрт на нашата пријателка Дајан Лангтон. Уживавме кога ја имавме како гостин на нашата најнова конвенција, нашето најдлабоко сочувство до нејзиниот сопруг Дерек и блиското семејство и пријателите”.

„Во целосен шок сум поради смртта на Дајан. Ми навираат спомените од нас како седивме на фризерското столче на снимањето. Се сеќавам на неа во соблекувалната со шише пиво! Таа беше уникатен, талентиран уметник. Духовита, љубезена и посебен пријател. Моите мисли се со Дерек“, напиша англиската пејачка Елејн Пејџ.

Дајан е родена на 31 мај 1947 година во англиската област Сомерсет. Актерската кариера ја започнала во 1959 година со филмот „Carry on Teacher“, а подоцна се прославила со улогите во сериите „Сплетки“ и „EastEnders“. Сепак, најдолго време беше во серијата „Hollyoaks“, каде 18 години ја глумеше Нана Меквин.