Ракометниот клуб Алкалоид се подготвува за новата сезона, а првиот официјален натпревар ќе го имаат претстојниот викенд во Германија.

Играчите предводени од тренерот Кирил Лазаров во рамките на квалификациите за групната фаза од ЕХФ Европската лига, во првиот меч гостува кај ТСВ Хановер-Бургдорф.

Сите во тимот се свесни дека не добија добра ждрепка, ќе се соочат со клуб кој доаѓа од најдобрата лига на светот, Бундес-лигата, но ветуваат дека ќе го дадат максимумот во двомечот за остварување на целта.

Првите 60 минути во Хановер ќе се играат на 31 август со почеток од 17.00 часот.

Реваншот ќе се игра во Скопје на 6 септември од 19.30 часот во Спортската сала „Автокоманда“ како што стои на официјалниот сајт на ЕХФ. Пред почетокот на тој натпревар, на РК Алкалоид ќе му биде доделен победничкиот пехар од ЕХФ Европскиот Куп освоен минатата сезона.