Пејачот Рики Мартин (51) и неговиот партнер Џван Јосеф (38) се разведуваат по шест години брак и две деца, пишува „Пипл“.

Рики и сириско-шведскиот уметник Џван,  ја споделија веста за нивната разделба во заедничка изјава овој четврток. Тие објаснија дека ќе продолжат да имаат пријателски односи и заеднички ќе ги воспитуваат своите деца.

„Решивме да го завршиме нашиот брак со љубов, почит и достоинство за нашите деца и почитувајќи го она што го доживеавме како пар сите овие прекрасни години“, напишаа во нивната изјава.

За време на нивниот брак, тие ги добија ќерката Лусија (4) и синот Рен (3), додека Рики исто така, ги има близнаците Матео и Валентино (14), за кои ќе продолжи да се грижи како самохран родител.

Инаку, Рики и Џван се запознаа виртуелно, преку нивните Инстаграм профили во 2015 година, а дури по неколку месеци дигитална комуникација, тој отпатува до Лондон за лично да го запознае Јосеф.

Следната година пејачот во интервју изјави дека двајцата се вериле, а во јануари 2018 година на јавноста ѝ откри дека тајно се венчале.