Првпат откако ја надмина Кина според бројот на жители и стана најнаселена земја во светот, Индија ќе се пребројува. Пописот, кој беше закажан за во 2021 година, но беше одложен поради пандемијата на ковид-19, треба да почне од септември и да заврши дури на пролет во 2026 година.
Стручната јавност го критикуваше одложувањето на пописот, тврдејќи дека предолгиот период без прецизни податоци за бројот и состојбата на населението има негативно влијание врз планирањето на економијата, пазарот на трудот, инфлацијата и квалитетот на животот. Основа за сите процени сѐ уште се податоците од 2011 година.

Министерството за внатрешни работи, задолжено да го спроведе пописот, и Министерството за статистика и спроведување на програмите поставија временска рамка, со граница поставена во март 2026 година. Податоците ќе се анализираат повеќе поради долгиот период помеѓу двата пописа. Прецизниот датум на почетокот на пописот треба да го објави премиерот Нарендра Моди.

Граѓаните ќе даваат одговори на 31 прашање, од кои 12 се однесуваат на домаќинството, а другите се за елементи што го дефинираат квалитетот на живот – пристап до тоалет, извор на вода, начин на греење и готвење, пристап до интернет, поседување радиоапарат, телевизор, компјутер, велосипед, мопед, мотор, автомобил, камион, фиксен и мобилен телефон, сѐ до „главната житарка што се консумира во домаќинството“.

Во првата фаза, која ќе трае меѓу шест и осум месеци, треба да бидат евидентирани сите домаќинства. Во втората ќе бидат забележани сите жители со пол, возраст, брачен статус, вероисповест, каста, мајчин јазик, степен на образование и економска активност.
За активностите на терен планирано е да бидат ангажирани околу 3,3 милиони попишувачи, кои се охрабрени да користат сопствен мобилен телефон за испраќање извештаи. Тие ги забележуваат податоците на печатени формулари, но ги испраќаат во дигитална форма до базата.

На пописот од 2011 година беа евидентирани 1.210.854.877 жители, што беше 17,7 отсто повеќе во споредба со претходниот од 2001 година. Најнаселена беше сојузната држава Утар Прадеш со нешто помалку од 200 милиони жители, а најмалата Сиким со 610.577 жители. Пописот покажа дека писменоста на населението е зголемена за 9,2 отсто на 74 отсто. Речиси 80 отсто од жителите биле индуси, 14,2 отсто се произнесле како муслимани, 2,37 отсто како христијани и 1,7 отсто како сики.
При собирањето информации, вкупно 2,7 милиони попишувачи посетиле домаќинства во 7.935 градови и повеќе од 600.000 села во 5.924 реони во 640 региони во 28 сојузни држави. За тој попис беа потрошени околу 260 милиони долари.