Синоќешниот натпревар помеѓу Грин Беј Пекерс и Далас Каубојс донесе повеќе од само спортска возбуда. За време на полувремето, Националната фудбалска лига (НФЛ) и Епл мјузик ја објавија веста што музичкиот свет со нетрпение ја очекуваше: шоуто на полувремето на Супербоул во Лондон ќе биде предводено од глобалната суперѕвезда Бед Бани, пишува „Њујорк тајмс“.

Настапот, кој ќе го гледаат стотици милиони гледачи ширум светот, ќе се одржи во недела, на 8 февруари 2026 година.

„Она што го чувствувам ме надминува и мене. Тоа е за оние кои дојдоа пред мене и истрчаа безброј јарди за да можам да влезам и да постигнам тачдаун… Ова е за мојот народ, мојата култура и нашата историја“, рече Бед Бани во најавата.

Ова ќе биде втор настап на Бед Бани на Супербоул. Првпат се појави како гостин на спектакуларниот настап на Шакира и Џенифер Лопез во 2020 година, а сега се враќа како главен изведувач на вечерта.

Оваа голема чест доаѓа на врвот на кариерата на 31-годишниот порторикански уметник. Во текот на летото, неговата резиденција „No Me Quiero Ir de Aquí“ донесе стотици милиони долари на економијата на Порторико.

Во јануари, тој го издаде својот шести студиски албум „Debí Tirar Más Fotos“, а се обиде и да глуми заедно со Адам Сандлер и Тревис Келси во филмот „Happy Gilmore 2“. Како тоа да не беше доволно, следната недела ќе ја преземе улогата на водител на премиерната епизода од 51-та сезона на популарното шоу „Сатурдеј најт лајв“.

Соопштението стави крај на месеците шпекулации за тоа кој ќе ја наследи сцената на Супербоул. Меѓу имињата за кои се шпекулираше беше и Тејлор Свифт, која наводно се откажа од преговорите откако НФЛ не ги прифати нејзините услови. Музички гиганти како Адел, Мајли Сајрус, Џеј-Зи, „Металика“ и „Би-ти-ес“ исто така беа во конкуренција.

Бед Бани има голема задача пред себе, бидејќи ќе мора да го надмине спектакуларниот настап на Кендрик Ламар на Супербоул минатата година. Во шоуто на Ламар, наградено со Еми, гости беа како Сиза, Семјуел Л. Џексон и Серена Вилијамс, а неговите изведби на песни како „GNX“, „Humble“ и „Not Like Us“ беа незаборавни. Од неверојатната кореографија до впечатливиот стил, тоа беше настап за паметење, но обожавателите со нетрпение очекуваат да видат какви изненадувања подготвува Бед Бани за 2026 година.

Бед Бани, чие вистинско име е Бенито Антонио Мартинез Окасио, е еден од највлијателните латино музичари на денешницата и глобална ѕвезда. Роден е на 10 март 1994 година во Алмиранте Сур, предградие на Вегалта, Порторико. Израснал во работничко семејство, а музиката го придружувала уште од мали нозе – пеел во црковниот хор до 13-годишна возраст, но наскоро станал повеќе привлечен од урбаниот звук што се пуштал на локалните радио станици.

Музичката кариера на Бед Бани започна речиси случајно. Додека студирал комуникации на Универзитетот во Порторико и работел како продавач во супермаркет, тој снимал песни и ги објавувал на платформата SoundCloud во слободно време. Неговиот прв голем хит бил Diles, кој го привлекол вниманието на продуцентот DJ Luian и го натерал да потпише за издавачката куќа Hear This Music. Набрзо станал едно од најпрепознатливите лица на таканареченото латино трап движење.