Синхронизираната акција на повеќе од 30 припадници на групата која во Хрватска се бавеше со фалсификување на пасоши за криминалци, меѓу кои и членови на опасните криминални кланови од белградски Земун, како и црногорските „шкаљарци“ и „кавчани“, повторно ја потврди старата теза дека хрватските државјанства и пасоши им се омилени на балканските криминалци, пишува српски „Блиц“.

Дали главна причина за тоа е фактот што хрватскиот пасош обезбедува подобар и полесен влез во земјите во Европа или поради можноста лесно и брзо да се набави по нелегални канали, хрватските документи години наназад претставуваат „сламка за спас“ на осудуваните и бараните криминалци ширум целиот Балкан.

Во рамките на вчерашната акција, уапсени се и полицијајци кои од полициските системи издвојувале луѓе кои се погодни за кражба на нивниот идентитет – исчезнати, луѓе за кои се верува дека нема да поднесат барање за издавање на пасош, луѓе кои физички наликуваат на криминалците и слично.

За шеф на оваа група се смета Нусрет Сеферовиќ (49), претседател на Советот на ромски здруженија во Хрватска.

На долгата листа на оние кои пасошите од сопствените земји ги заменија со хрватската „шаховница“ се и најзвучните имиња од балканското подземје – од Милорад Улемек Легија, преку Сретко Калиниќ и Лука Бојовиќ (луѓе кои се дел од одговорните за убиството на поранешниот српски премиер Зоран Ѓинѓиќ), па се до Дарко Шариќ.

Кои криминалци успеале да стигнат до хрватски пасош?

Хронолошки гледано, последен во низата на уапсени криминалци чие име одекна во медиумите е она на Милош Радоњиќ, кој само пред четири месеци е уапсен во Славонски Брод во Хрватска. Означен е како истакнат припадник на кавачкиот клан од Црна Гора.

Тој е фатен во хотелска соба, откако во Нова Градишка поднел барање за издавање на нов хрватски пасош. Тоа го направил со фалсификувани документи. Кога е приведен, полицајците сфатиле дека станува збор за Радоњиќ, за кого Црна Гора имаше распишано потерница.

Неговото име се спомнуваше и во контекст на пресметките меѓу црногорските кланови, а досега има преживеано четири атентати. Токму поради еден обид за убиство на Радоњиќ, во Белград е сослушан Јован Вукотиќ на барање на црногорското Министерство за правда.

Во април 2003 година, хрватското МВР потврди дека бараниот криминалец Милорад Улемек – Легија користел фалсификуван пасош кој бил издаден на името Владо Вукомановиќ. Таа патна исправа, што ќе се дознае подоцна, е една од 900 кои се издадени во хрватскиот конзулат во Мостар, установа која се најде во центар на голема афера која подоцна е откриена.

Поради фалсификат е уапсен еден конзул, а една чиновничка изврши самоубиство. Прецизирано е дека Улемек 26 пати поминал различни граници со овој лажен документ.

Освен Легија, уште еден член на земунскиот клан во Загреб земал хрватски исправи: тоа се случи во 2006 година, пасошот гласел на име Драго Церсар, а земунецот бил Сретко Калиниќ Звер. Имал уште еден пасош кој подоцна го земал, а според тој, опасниот криминалец се викал Миливој Мандиќ.

Пасошот е пронајден откако, по неговото ранување во 2010 година, тој е уапсен во Загреб. Наводно го набавил Цветко Симиќ, кумот на исто така опасниот криминалец Лука Бојовиќ, чие обезглавено тело е пронајдено истата година на дното за загрепското езеро Јарун. За овој документ наводно е платено 26.000 евра.

Калиниќ инаку е означуван како еден од најбруталните платеници кој извршувал убиства за земунскиот клан. На судењата, тој повеќе пати ладнокрвно зборувал за деталите на убиствата кои ги вршел, а во моментов се наоѓа зад решетки за убиството на српскиот премиер Зоран Ѓинѓиќ и осуден е на 30 години затвор.

Опасниот наркобос Дарко Шариќ со лична карта која се водела на името на извесен Томислав Саватовиќ (украден идентитет), во хрватскиот конзулат во БиХ во Тузла побарал и добил пасош.

На основа на овие документи, Шариќ добил легална патна исправа, но на нелегален начин. Сепак, за ова кривично дело никогаш не одговараше, бидејќи случајот застаре.