Владата на Црна Гора го повлече предлог-законот за Агенцијата за национална безбедност (АНБ) од собраниската процедура, по критиките дека дава поголеми овластувања на тајната служба со помала контрола врз нејзината работа, пренесува црногорскиот сервис на РСЕ.

Собранието требаше да го дискутира и гласа предлог-законот на денешната седница, последна пред едномесечната пауза.

Сепак, претседателот на Собранието Андрија Мандиќ изјави пред дебатата дека е одлучено да се повлече од постапката бидејќи не бил „добро комунициран“ со домашната јавност и меѓународните партнери.

Европската комисија претходно изјави дека очекува Црна Гора да даде соодветни појаснувања во врска со целта и обемот на предложените измени на законот и да им овозможи да спроведат темелна анализа пред неговото усвојување.

Владата на Црна Гора го менува законот за Агенцијата за национална безбедност под притисок на јавноста

Првичниот предлог-закон предвидуваше дека АНБ може без прашања, дозвола и независен надзор – да пристапи до здравствените картони, банкарските сметки, телефонските листи и локациите на секого, како и до поднесените извештаи.

Исто така, директорот на АНБ имаше право во случај на итност да покрене мерки за таен надзор на електронските комуникации без претходна согласност од судот.

Невладиниот сектор ја поздрави одлуката на Владата да го повлече Законот.

„Очекуваме нападот врз човековите права преку законски иницијативи – и од страна на поединечни членови на владејачкото мнозинство и од страна на Владата – да престане“, соопшти Акцијата за човекови права.

Повеќе од 20 организации инсистираа на целосно повлекување на Предлог-законот од парламентарната процедура со цел да се усогласи со домашните и меѓународните стандарди и препораките на Комитетот за човекови права на Обединетите нации.

Во април, Комитетот на ОН изрази загриженост до црногорските власти за недоволните механизми за заштита на правото на приватност на граѓаните за време на активностите на АНБ, особено проблематизирајќи го пристапот до лични податоци без судска контрола.

Уставниот суд на Црна Гора утврди во 2014 година дека само судот е овластен да одобрува мерки што ја нарушуваат доверливоста на комуникациите.