Денеска се одиграа пет натпревари од 23 коло во Првата македонска фудбалска лига, актуелниот шампион Струга славеше на домашен терен со 1:0 против Воска Спорт. Единствениот погодок за Струга беше дело на Малески во 88 минута од средбата за 11 победа сезонава во шампионатот.

Со истиот резултат Шкендија беше подобра од Пелистер со голот на Ибраими во 73 минута.

Немаше победник на натпреварот Гостивар – Брера Струмица (2:2), поведоа домаќините со голот на Каланоски во 25 минута, а во судиското надополнување израмни Велков (45+2`).

Струмичани дојдоа во водство преку Ѓоргиевски во 52 минута, а домаќините го избегнаа поразот со погодокот на Ајдоган во 87 минута. Две минути подоцна Гостивар остана со фудбалер помалку поради вториот жолт картон на Чешмеџиев, но резултатот не се менуваше до крајот на мечот.

Силекс и Вардар ремизираа 1:1, клубот од Кратово водеше од 12 минута со голот на Алиќ. Скопските „црвено-црни“ успеаја во самиот финиш од средбата да дојдат до бод во 95 минута благодарение на Омерагиќ.

Најмногу голови имаше на натпреварот Шкупи – Беса 1976 кој го добија гостите со 3:2.

Водеше Беса 1976 од 13 минута со голот на Шефити, а позитивата беше зголемена по автоголот на Лазаров во 28 минута.

Четири минути подоцна тимот од Чаир ја намали својата негатива преку Асани од пенал. Стојановски во 60 минута се погрижи за 3:1, а поразот на домашниот тим го ублажи Рамани во 79 минута.

На табелата моментно првопласираната е екипата на Шкендија со 49 бодови, четири повеќе од Силекс на второто место, а трет е Гостивар со 44.