Денес беше одиграно и претпоследното коло во Првата македонска фудбалска лига пред кое немаше скоро никаква неизевеност. Единствено Академија Паднев имаше некаков резултатски императив и со ремито против Брегалница го потврди опстанокот во друштвото на најдобрите.

Новиот шампион Струга Трим Лум забележа уште една победа, сега против Шкендија во Тетово со 1:2. Се што беше интересно на оваа средба се случуваше во второто полувреме. Шала ја доведе Шкендија во водство, но десет минути подоцна Рамадани заработи исклучување.

Предноста од играч повеќе Струга знаеше да ја искористи и со два гола на Шабани до крајот на натпреварот го сврте резултатот во своја корист.

Шкупи немаше проблеми и на домашен терен во Чаир ја совлада Македонија Ѓорче Петров со убедливи 3:0. Два гола за чаирчани постигна Адетунџи, еден беше дело на Али Адем.

Со бодот во Штип против Брегалница, Академија Пандев го обезбеди опстанокот и го испрати Скопје на бараж со Вардар. Додев ги доведе штипанија во водство во 50-тата минута, а конечните 1:1 ги постави Трајков во 67-та минута.

Силекс со головите на Ѓорѓиевски и Манасиевски во првото полувреме го совлада Работнички со 2:0. Најубедлив денес беше Тиквеш кој го декласираше Скопје со 4:0.