Известувачот на Европскиот парламент за Србија, Тонино Пицула, на пленарната седница во парламентот изрази жалење за жртвите во трагедијата во Нови Сад и посочи дека граѓаните организирале протести барајќи правда и одговорност, пишува European Western Balkans (EWB).

„На први ноември годинава во Нови Сад во Република Србија се случи страшен трагичен инцидент кога на главната железничка станица во градот се урна бетонска настрешница. Овој немил настан резултираше со загуба на 14 животи“, изјави Тонино Пицула, пренесува EWB.

Тој рече, како што е наведено, дека Железничката станица се реконструира последните три години и дека во моментов се истражуваат причините за уривањето.

„По трагедијата, граѓаните организираа протести за да им оддадат почит на жртвите, барајќи правда и одговорност за оваа трагедија. Почитувани колеги, жалиме за жртвите од оваа трагедија во Србија и им оддаваме почит“, рече Пицула, пренесе овој медиум.

Да потсетиме, минатиот месец Тонино Пицула беше избран за известувач за Србија во Европскиот парламент. На почетокот на денешната пленарна седница пратениците им оддадоа почит и на жртвите од поплавите во Валенсија.