Пицерија во срцето на Неапол, која ја основал човек кој му правел пица на Бил Клинтон, е запленета од полицијата во истрага поврзана со мафијата.

Сопственикот на Дал Президенте и неговата сопруга се меѓу петте лица уапсени под сомнение дека бизнисот е поврзан со кланот Контини на Камора, пренесува Гардијан.

Пицеријата, на улицата Трибунали, ја отворил покојниот Ернесто Кацијали, кој го добил прекарот „пица претседател“ откако подготвил пица за Клинтон во Ди Матео, каде што работел кога поранешниот американски претседател бил во градот за Самитот на Г7 во 1994 година. Клинтон бил во обиколка на историскиот центар на Неапол со неговата придружба од телохранители кога, наводно, бил привлечен кај Ди Матео од мирисот на пицата.

Кацијали, кој освоил неколку награди за правење пици, го отворил Дал Презеденте во 2001 година, каде што „правеше илјада пици дневно“ до неговата смрт на 60-годишна возраст, според веб-страницата на Ла Фиглија Дел Президенте, ресторан во сопственост на неговата ќерка.

Купувањето на Дал Президенте од неговиот сегашен сопственик, наводно, било финансирано со пари кои дошле од истакнат член на кланот Контини. Осомничениот мафиозо се „заинтересирал“ и за бизнисот, „од пекарскиот персонал до изборот на производи што се користат за тестото“, објави Ил Фато Квотидиано.

Пицеријата, популарна кај Наполитанците и туристите, е меѓу имотот вреден 35 милиони евра, кој полицијата го заплени во истрагата.

Нејзината конфискација беше изненадување за редовните клиенти.

„Јадев таму многу пати, тоа е една од најпознатите пицерии во Неапол“, рече еден клиент, кој побара да остане анонимен. „Пицата беше многу добра, но слушнав од други дека има нешто малку чудно во неа… тогаш сето тоа излезе вчера“.

Тројца од осомничените се затворени, додека двајца, меѓу кои и еден полицаец, се во домашен притвор. Тие се соочуваат со обвиненија за лажни трансфери на средства и перење пари.