Владата на СДС и ДУИ преку МЗШВ, конкретно Љупчо Николовски работела со голем број нерегуларности, сомнежи за криминал и надвор од закон. Постои основано сомневање дека во 2021 година е пуштено во промет брашно во вредност од над 2 милиони евра без за истото уредно да биле платени контролните марки во МЗШВ, рече на прес конференција Бране Петрушевски од ВМРО-ДПМНЕ.

-Според Извештајот на ДЗР за МЗШВ за 2021 година, изготвен во 2023 година јасно се нотира МЗШВ, со кое раководел Љупчо Дон Николовски не воспоставило евиденција на набавените и издадените контролни марки за ставање во промет на брашното, ниту пак  контроли во тој процес. Постои основан сомнеж дека Љупчо Дон Николовски и владата на СДС и ДУИ дозволиле во промет да циркулира брашно кое имало контролни марки кои не биле уредно платени во МЗШВ – вели Петрушевски.

Ревизорот констатирал дека за 2021 година МЗШВ набавило контролни марки во вкупна вредност од 3 милиона 305 илјади денари, а издало контролни марки во вредност од 2 милиона 242 илјади денари. Разликата во вредност која се јавува, и не е евидентирана во МЗШВ дали се работи за издадени контролни марки без да се наплатат изнесува 1 милион 63 илјади денари, односно тоа се 5 милиони 315 илјади контролни марки.

Тој праша дали Николовски дозволил пуштање на промет на брашно во вредност од над 2 милион евра без да има уредно наплатени контролни марки? Кому му дал  Николовски контролни марки за увоз на брашно без истите да ги платат и што презело ЈО по однос на ова прашање и зошто повеќе од година дена се молчи?