Пратеничката на СДСМ, Славјанка Петровска, на гостувањето во емисијата „Само вистина“ на „Канал 5“, ги повика сите засегнати, како и сите директори на АНБ, вклучително и сегашниот директор, да се согласат да подлежат на полиграфско тестирање пред собраниската комисија за надзор.

Таа ја повтори често користената теза на СДСМ дека ВМРО-ДПМНЕ секогаш кога е во опозиција, се жали дека нејзините функционери биле следени и го критикуваше одбивањето на владејачката партија за декласификација на документите.

„Зошто не дозволивте да се декласифицираат документите кои се наводно дел од следењето, каде што може да се прочита целата содржина? Може ли вака да се договориме: ако не сакате да ги декласифицираме документите, бидејќи на комисијата беше попречен надзорот, дали се согласувате сите ние во Собранието секој што бил предмет на следење според закон, значи сите што излегоа во јавност, вклучувајќи ги сите директори на АНБ, исклучително сегашниот директор, да подлежат на полиграфско тестирање пред комисијата за надзор?“, праша Петровска во дебатата на „Канал 5“.