Адам Кадиров, 15-годишниот син на чеченскиот лидер Рамзан Кадиров, кој оваа година беше снимен како тепа затвореник во притвор, е назначен на највисоката позиција меѓу телохранителите на неговиот татко, пренесува Ројтерс.

Еден од највисоките безбедносни функционери на Кадиров, Замид Чалаев, рече дека Адам е назначен за шеф на одделот за безбедност на чеченскиот лидер.

Сојузниците на чеченскиот лидер го пофалија Адам Кадиров, кој овој месец треба да наполни 16 години, за неговата храброст и му честитаа на назначувањето.

Во септември, помладиот Кадиров наиде на осуда од светот, како и од некои тврдокорни проруски коментатори, откако неговиот татко објави видео на социјалните мрежи на кое се гледа како Адам удира и клоца затвореник обвинет за палење на Куранот.

Рамзан Кадиров, сојузник на Путин, тогаш изјави дека е горд на својот син и дека го почитува Адам затоа што се здобил со „возрасни идеали за чест, достоинство и одбрана на својата вера“.

Агенцијата РИА пред два дена објави дека Адам Кадиров во октомври ја добил титулата Херој на Чеченија. Прес-службата на Рамзан Кадиров не одговори на барањето на Ројтерс за коментар.