Политичарот Петар Богојески со еуфоричен статус на Фејсбук денеска најави дека со посредство на дипломатски канали и со неговите врски во дипломатски кулоари успеал да обезбеди пет милиони вакцини од производителот АстраЗенека од Велика Британија.

Според напишаното од Богојески, вакцините може да пристигнат за еден ден во Македонија од Британија, но нашата влада треба да направи нарачка.

Меѓутоа, од Министерството за здравство за „Слободен печат“ велат дека сите понуди од компаниите производители им се познати, вклучително и онаа за која пишува Богојески. Меѓутоа, оваа понуда не е прифатлива, децидни се од МЗ.

„На пазарот во моментов има многу понуди но не се сите возможни или применливи за нас.  Некои немаат  сертификација, некаде се нудат количини кои се за нас преголеми, на пример минимум 5 милиони дози и слично.  Ние сме во постојана комуникација со производителите и ги знаеме сите можности на пазарот”, ни рекоа од Министерството за здравство.