Денеска се навршуваат пет години од насилниот упад во Собранието кој се случи на 27 април 2017 година. На упадот му претходеше протест пред Собранието од кој се упатуваа националистички пораки. По изборот на Талат Џафери за претседател на Собранието, протестот ескалираше. Толпата во која имаше и луѓе со фантомки, се проби низ полицискиот коридор и преку главниот влез влезе во собраниската прес-сала.

Она што медиумите го забележаа беше невидено насилство, повредени новинари, пратеници со раскрвавени глави, пискотници и повици за помош. Собранието се претвори во кланица, а полицијата не можеше, односно не сакаше да ја контролира ситуацијата.

Пет години по „крвавиот четврток“, од владејачката СДСМ велат дека тој бил вистинското лице на ВМРО-ДПМНЕ и порачаа дека нема да дозволат никогаш да се повтори.

„Нема да се повтори само ако сите политички субјекти во земјава, не само декларативно, туку суштински, се обединат зад демократските и слободарски вредности. 27 април 2017 е еден од најцрните датуми во историјата на македонската демократија и македонското општество. За да спречат промена на власта и почитување на изборната волја на граѓаните, вооружени насилници поттикнати и злоупотребени од ВМРО-ДПМНЕ насилно упаднаа во Собранието во обид да убијат пратеници, да повредат новинари и вработени во собраниските служби“ рече Јован Митрески, координатор на пратеничката група на СДСМ и коалицијата.

Заради лични и партиски интереси на, како што рече тогашното раководство на ВМРО-ДПМНЕ, за спас од криминалот и за спас на режимот, државата на тој 27 април беше доведена на работ на амбисот, пред граѓанска војна, додаде Митрески.

Пет години подоцна, од држава на раб на граѓанска војна, денес сме демократска држава членка на НАТО, пријател и сојузник со соседите и демократскиот свет. СДСМ и парламентарното мнозинство, никогаш нема да дозволи да се заборави 27 април. Заедно со граѓаните нема да дозволиме никогаш да се повтори ваков срамен и трагичен настан во македонската демократија“, порача Митрески.

Министерот за внатрешни работи, Оливер Спасовски, оцени дека пет години по 27 април ништо не е исто, се е многу понапредно, државата, институциите, посебно МВР.

– Ако разговараме за настанот од 27 април, тоа беше насилен упад во Собранието, чија цел беше да бидат убиени пратениците и да не се дозволи преземање на власта, нешто што не доликува на едно демократско општество. Ако го споредиме тој момент и денеска ништо не е исто. Се е многу понапредно, и државата и институциите, посебно институцијата со која раководам, а тоа е македонската полиција, изјави Спасовски.

Во 2017 година, истакна тој, разговараме за полиција, за служба што ги крши човековите права и слободи, а се сеќаваме, рече, на големата афера на прислушување кога повеќе од 22 илјади граѓани беа прислушувани и им беа кршени човековите слободи и права.

Градоначалникот на општина Куманово, Максим Димитриевски го коментираше судскиот процес за „крвавиот четврток“. Тој порача дека правдата не смее да биде селективна, да заглават само подредените и подведените.

„Правдата не смее да биде селективна, или казна за сите или пак амнестија за сите, за жал како и секогаш заглавија само подредените и подведените додека сценаристот, режисерите и политичарите повторно се извлекоа и спогодија. Историјата и идните генерации ќе судат кој правилно постапи. Никогаш да не се повтори!“, напиша Димитриевски на Фејсбук.

Денеска пред затворот во Прилеп се одржа и протест по повод, како што стоеше во најавата, неправедно осудените за случајот 27 април. Протестот го организираше Патриотски институт на ВМРО-ДПМНЕ „Гоце Делчев“, а на него свое обраќање имаа Мане Јаковлевски, претседател на Унијата на ветерани и Александар Пандов, претседател на Патриотскиот институт.

КРВАВИОТ ЧЕТВРТОК – 27 АПРИЛ НИЗ ФОТОГРАФИИ