Тензиите на Балканот не се предизвикани од српската страна, изјави денес портпаролот на Кремљ, Дмитриј Песков, зборувајќи за темите на разговор меѓу рускиот претседател Владимир Путин и српскиот претседател Александар Вучиќ.

„Односите се разновидни и на дневен ред има многу специфични прашања. Ова вклучува прашања за соработка во секторот за гориво и енергија, како и соработка во областа на културата, размена на студенти и друго. И секако, ова е интеракција во смисла на регионални тензии, кои беа предизвикани далеку од српската страна“, рече Песков, пренесува агенцијата ТАСС.

Песков рече дека разговорот меѓу Путин и Вучиќ се одржал во традиционално добра атмосфера.

Одговарајќи на новинарско прашање дали може да се очекуваат некакви договори меѓу Србија и Русија и дали има добри вести во врска со гасот, Песков рече дека секогаш има добри договори со Србија и повтори дека Белград е добар пријател и партнер на Москва.

Претседателот на Србија, Александар Вучиќ, е во Кина од 2 до 4 септември, каде што присуствува на одбележувањето на 80-годишнината од победата во Втората светска војна на покана на претседателот на Народна Република Кина, Си Џинпинг.

Вчера во Пекинг, Вучиќ се сретна со Путин, по што рече дека е особено среќен што Путин „уште посилно кажа колку е важно за Србија да ја зачува својата независност“.

Вучиќ оцени дека средбата со рускиот претседател била добра и корисна за Србија.

„Горд сум на нашата работа, на ставот на Србија, на фактот дека дури и кога сме критикувани и напаѓани, насекаде сме почитувани, бидејќи знаат дека Србија е независна, слободна и слободарска земја“, рече Вучиќ.