Сите овие години, не само што имаме добри политички односи со Италија, исто така имаме и економска соработка, која можеби не е на нивото на кое посакуваме да биде, меѓутоа има перманентен раст.

Oва денеска на прес-конференција го потенцираа Антони Пешев, претседавач на Собранието на СКМ, како и италијанскиот амбасадор во нашата земја, неговата екселенција Карло Ромеро.

Со воспоставувањето на дипломатските односи во 1993 година помеѓу Република Северна Македонија и Република Италија, билатералните односи во изминатите 26 години ги карактеризира силната политичка и економска поддршка која Република Италија и ја дава на Република Северна Македонија.

– И покрај зголемената економска соработка, учеството на италијанското стопанство во нашата размена е преполовено. Причина не е немањето интерес од италијанска страна, туку тоа што развојот на индустриските зони го дефокусира класичниот капацитет за пласман на македонските производи, рече Пешев.

Согласно последните годишни податоци на Државниот завод за статистика на Република Северна Македонија, 2018 година беше многу позитивна година за трговските односи меѓу Италија и Република Северна Македонија, со зголемување на вредноста на вкупната билатерална трговија, која достигна близу 614 милиони евра, или за 13,2% повеќе во однос на 2017 година. Вредноста на македонскиот извоз изнесуваше 184,1 милиони евра, што претставува зголемување од 12,34% во споредба со 2017 година. Увозот од Италија достигна вредност од 430,25 милиони евра, со раст од 13,6% во споредба со 2017 година.

Република Италија е значаен трговски партнер на Република Северна Македонија и перманентно се наоѓа на листата од првите десет земји со кои нашата држава има најголем обем на трговска размена и деловна соработка. Тековите на италијанските директни инвестиции во странство во Северна Македонија се концентрирани главно во градежништвото, земјоделските производи, текстилот, обувките и обработката на метал, а присуството на италијански компании е исто така важно во секторот за обновлива енергија.

Во државава се активни околу 130 компании со италијански капитал претежно од чевларската, хемиската и металопреработувачката индустрија.

Билатералните односи помеѓу Република Северна Македонија и Република Италија ги карактеризира интензивен политички дијалог и значајна динамика во соработката во сите области каде бројните реализирани посети на високо ниво, како и редовните средби помеѓу двете земји исто така придонесуваат кон добрите политички односи.

Според италијанскиот амбасадор, Карло Ромео, италијанските компании се генерално задоволни од условите за водење бизнис, но имаат неколку битни забелешки, а тоа се, како што кажа Пешев, владеењето на правото и на недостигот на квалитетна работна сила. Проблем плус, додаде Ромео, се и долгите, комплицирани процедури кои не се секогаш јасни.

– Италија е голем поддржувач на Северна Македонија, а нашите компании имаат сериозен интерес за соработка. Со влезот на вашата земја во НАТО можностите ќе се прошират, посебно во делот на одбраната и безбедноста. Во моментов, тука има вкупно 130 италијански компании со реализирани вкупно 122 милиона евра инвестиции. Главно се во доменот на индустријата, машинската, металургијата и енергетиката, истакна амбасадорот.

На новинарско прашање, дали новиот закон за отпад ќе има некакво влијание врз италијанските компании и колку тие би биле оштетени од тоа, поради што Италија е третата земја од која Македонија најмногу увезува отпад, амбасадорот Ромеро одговори:

– Искрено немам податоци за ова, поради тоа што законот беше донесен пред извесно време. Немам податок и колку и како ќе бидат оштетени компаниите, но доколку сакаат да се продолжат да соработуваат со вашата земја ќе треба да се прилагодат на новите законски решенија.