Адвокатот Валентин Пепељугоски вечерва во емисијата „Бизнис21“ на ТВ21 рече дека владините мерки за намалување на цените на храната и основните производи, т.н. „кошнички“ не ја завршуваат работата за која се наменети.

Според него, откако ќе помине периодот во кој се ограничени маржите на трговците, тие уште повеќе ги покачуваат цените.

„Со временото ограничување на цените, после имате експанзија на цените. Јас сум поборник за тоа пазарот да функционира, државата да ги востанови правилата на игра, а ако некој ги крши, тогаш да интервенира и да го казни“, вели Пепељугоски.

Пепељугоски вели дека постои политичко влијание околу темата и смета дека министерот за економија „нема причина да зборува“ за казните за трговците кои не ги почитуваат правилата, за што е надлежна Комисијата за заштита на конкуренцијата.

„Да престанеме со административните мерки. Тие се најлесни да ги донесете, ама тоа е изразување на немоќ“, рече Пепељугоски.