Како „бомба“ вчера одекна веста дека Пеп Гвардиола ќе ја преземе фудбалската репрезентација на Англија.

Но, менаџерот на Манчестер сити ја одби понудата, па Англичаните сега бараат друго решение.

Прв избор е германскиот стручњак Томас Тухел, кој работеше во Борусија Дортмунд, ПСЖ, Баерн Минхен и Челси.

Тухел нема тренерски ангажман од минатиот мај кога доби отказ од Баерн и има големи шанси да ја прифати поканата на ФА. Контакт имаше пред две недели, нема и натаму официјална понуда, но на Тухел му се даваат најголеми шанси пред Греам Потер и Еди Хау.

Техничкиот директор на ФА, Џон Мекдермот води кампања за Тухел. Неговата идеја е да добие тренер со искуство во освојување трофеи, а Германецот има титули со ПСЖ и Баерн, како и Лигата на шампионите со Челси.