Со минимална пензија од 12.000 денари не може да се живее, раскажува пензионерката Вера Стојановска која денеска протестираше пред Жена парк, во Скопје. Таа вели дека сè уште немаат купено лубеница, бидејќи не можат да си дозволат. Порача дека минималната пензија треба да биде 25.000 денари, бидејќи зголемени се трошоците за живот, се плаќаат повисоки сметки за струја, вода, а зголемени се и трошоците за храна.

Пензионерите од главниот град денеска одржаа протест пред Жена парк, со што им се приклучија на пензионерите од другите градови кои веќе излегоа и побараа покачување на минималната пензија и линеарно, а не процентуално зголемување на пензиите.

Досегашниот износ не ги задоволува ниту минималните потреби за едно обично нормално живеење на луѓето..Ситуацијата во која пензионерите се наоѓаат со пензиите е неиздржлива, едноставно не може да се живее со толку пари. Образложенијата на министерката за труд и социјална политика и претседателката на пензионерите не држат, нема што да се чека институционално. Покачувањето на платите на функционерие за 78 отсто можеше одма да се донесе, а за нас е долг патот – вели една од пензионерките.

На прашњето дали ќе одржат заеднички протест со пензионерите од другите градови, тие информираат дека предвидено е на 14 август во Скопје да се одржи протест, а се надеваат дека ќе биде помасовен, со што ќе има можност да допре повеќе до тие кои треба да одлучуваат.