Во Свети Николе денес пензионери организираа протест, изразувајќи го своето барање за рамномерно зголемување на пензиите. Тие апелираат од септември натаму корекцијата на пензиите да се базира на линеарен модел, наместо на процентуален.

Трајче Станојков, член на Иницијативниот одбор на пензионерите, рече дека само со ваков пристап може да се обезбеди пристоен живот и да се редуцираат разликите помеѓу највисоките и најниските пензии во државата.

„Да продолжиме да си го бараме тоа истото покачување односно усогласување на пензиите линеарно, не процентуално”, рече Станојков.

Според Трајче Митев, пензионер од Штип, координираната акција може да доведе до остварување на посакуваната цел.

Покрај барањето за линеарно зголемување, пензионерите исто така инсистираат на оставка од сегашната претседателка на Сојузот на здруженија на пензионери, Станка Трајковска.

Пензионери од Свети Николе, Штип, Куманово и други градови нагласија дека ќе го бојкотираат гласањето во октомври, доколку нивното барање за линеарно усогласување на пензиите не биде исполнето до септември.