67-годишен Хрват со богато полициско и судско досие е повторно на суд за серија бизарни кражби – тој на судот се бранел со оправдувања кои повеќе наликуваат на реплики од комедија отколку на сериозна одбрана, пренесува „Подравски лист“.

Според весникот, криминалецот со досие кое се протега на две цели страници, е осуден на единствена затворска казна од една година и четири месеци од Општинскиот суд во Копривница. Тој бил осудуван за разни дела – од нелегално поседување оружје, занемарување и злоупотреба на дете, до нелегален лов и тешки кражби.

Неговите нови криминални авантури завршиле неславно кон крајот на минатата година, кога во два наврата бил фатен на дело. Првиот инцидент се случил на 3-ти ноември околу 13 часот, кога влегол во незаклучена и ненаселена семејна куќа во селото Река. Според судските документи, 67-годишникот ја отворил заглавената влезна врата и влегол внатре, но не можел ништо да украде бидејќи бил фатен на дело од двајца локални жители, кои веднаш ја повикале полицијата. Пред судот, тој понудил необично објаснување:

„Не знаев чија куќа е, а ме стегна, па морав да одам во тоалет. Викнав, но никој не се јави, само малку ја турнав вратата и таа се отвори.“

Тој објаснил дека таму се нашол затоа што барал човек што изработува чамци, сакајќи да купи еден за риболов, и дека мештаните му рекле да праша „во куќата подолу“.

Очигледно необесхрабрен од својот прв неуспех, криминалецот-ветеран се обидел да изврши уште една кражба само четириесет дена подоцна, на 13 декември околу 14:30 часот, овој пат во заклучена и исто така ненаселена семејна куќа во селото Соколовац кај Копривница. Користејќи шрафцигер, тој се обидел насилно да го отвори прозорецот, но притоа, едно од крилата на прозорецот паднало на подот, а бучавата го привлекла вниманието на соседите. Тие го фатиле на дело и повторно повикале полиција. Неговата одбрана во овој случај е уште поурнебесна – тој тврдел дека влегол во дворот, се сопнал, удрил со главата од прозорецот и го скршил.

„Го барав Владо Калембер, ми должеше пари од казино неколку дена претходно“, рекол тој пред судот, тврдејќи дека чеканот и шрафцигерот пронајдени под прозорецот не се негови и дека тој само тропал и викал на прозорецот, а не се обидувал да провали во куќата.

Сепак, еден од сведоците што го пронашол во Соколовац раскажа поинаква приказна. Сосед го повикал и го предупредил дека непознат маж се обидува да ги подигне ролетните и да го отвори прозорецот. Кога пристигнал на местото, ја видел предната порта од оградата отворена и велосипед потпрен на ѕидот од куќата.

„Во моментот кога влегов во дворот, слушнав кршење стакло од страната на куќата, а кога отидов таму, го затекнав непознатиот маж како се обидува да излезе од дворот. Го прашав што прави таму, а тој ми рече дека го бара Владо Калембер, кој му должел 300 евра“, раскажал сведокот, давајќи ѝ на приказната уште побизарен пресврт, поврзувајќи го локалниот крадец со познатиот пејач на бендот „Сребрна крила“.