Претседателскиот кандидат Стево Пендаровски ќе достави до Комисијата за спречување и заштита од дискриминација претставка за говорот на омраза, навредите и дискриминацијата од страна на кандидатката Гордана Силјановска-Давкова и од ВМРО-ДМПНЕ, која што ја поддржува нејзината кандидатура, информираат од Медиа центарот на Пендаровски.

-Гордана Силјановска-Давкова и ВМРО-ДПМНЕ во повеќе наврати, на јавните собири и митинзи, искажаа лични навреди и клевети за кандидатот за претседател Пендаровски, кои што, освен што го нарушуваат неговото достоинство и неговите чест и углед, исто така содржат и елементи на говор на омраза, со што наведените може да поттикнат други лица да сторат дела од омраза. Пендаровски материјалот ќе го достави до ДИК, чиј што Кодекс за фер и демократски избори го потпиша кандидатката и партијата која ја поддржува, до набљудувачката мисија на ОБСЕ/ОДИХР, до делегација на ЕУ, како и до амбасадите на земјите членки на НАТО и Европската Унија, во нашата земја – велат од Медиа центарот.

Од таму додаваат дека со оглед на тоа што ДИК одлучува по приговори, а не по претставки, во врска со почитувањето на одредбите од Изборниот законик и до Комисијата ќе се достави материјалот заради нивно информирање.

-Тие, како носители на изборниот процес, имаат морална обврска да се запознаат со флагрантното кршење на Кодексот од кандидатката и партијата ВМРО-ДПМНЕ – велат од Медиа центарот на Пендаровски.