Денеска во рамките од шестото коло во Првата македонска лига Пелистер ја оправда фаворитската улога славејќи убедливо над Куманово 2009 со резултат 97:71.

Ако првото полувреме делуваше доста израмнето и покрај фактот што кумановци во Битола допатуваа без помошта од тројца битни играчи како што се Зивчевиќ, Каплановиќ и Николиќ, сè беше поинаку во продолжението.

Со една силна, ефикасна четвртина„ зелено-белите“ ги тргнаа сите дилеми околу тоа кој ќе биде победникот на вечерашниот натпревар. Втор од ова шесто коло од Првата лига, по вечното дерби одиграно пред некоја вечер во Аеродром.

По релативно израмнетото прво полувреме во кое Пелистер имаше игра и водство од 45:41, битолскиот „ураган“ дојде во третата четвртина. Одлични 10 минути во кои домашната екипа направи 27:9 за високи, убедливи, недостижни 72:50.

За шеста победа во серија која го враќа составот од Битола на првото место на табелата со максимални (6-0) со кои е пред МЗТ Скопје Аеродром (скор 5-1). Екипата со која ќе ги одмерат силите и во „балонот“ на АБА 2 лигата кој стартува на почетокот на следната седмица во Осијек, Хрватска.

Дури седум кошаркари на Пелистер имаа двоен број на поени. Најмногу вкупно 22 реализираше Кесар, репрезентативецот Ѓуроски помогна со 16, а за гостите од Куманово кои во Битола допатуваа со само девет играчи, Холмс запиша 19 коша.