Магаренцето на „МакеДокс“ патува веќе петнаесет години и стана препознатливо по своето волшебно самарче. Патувачкото кино на „МакеДокс“ раскажува и забележува приказни, тоа е неговата суштина. Спојува луѓе, енергии, судбини, преплетува исконски и современи приказни. На културата гледа пошироко од кино сали и помпезни настани. Ги носи на грб филмовите и го полни самарот со приказни до кои ретко се допира, ако не се оди пред кооперација, на сретсело, ако не се испие кафе или ракија, со некои добри луѓе.

Патувачкото кино на „МакеДокс“ секоја година посетува нови 8-10 (помали) места и села во различни региони од Македонија. Сите проекции се сретсело, под отворено небо и се бесплатни.

Магаренцето во 2024 година ќе се прошета во Битолско и Демирхисарско. Првата станица на која магаренцето ќе се растовари е во селото Смилево, каде на 20 јули ќе има проекција на отворено на документарниот филм „Манаки – приказна во слики“ на Роберт Јанкулоски.

Првата проекција во Смилево е во соработка со Фестивалот на алтернативна фотографија „Зрно“ и НУ Смилевски конгрес.

(Текстот е објавен во „Културен печат“ број 240, во печатеното издание на весникот „Слободен печат“ на 20-21.7.2024)