1. Имаш прифатени понуди од неколку престижни универзитети во Велика Британија и САД, но избираш да студираш во Европа. Кои се најважните критериуми што ти помогнаа да го направиш тој избор?

Целиот мој живот имав план да студирам во Америка и таму да живеам. Но како што созревав и како што земав предвид повеќе работи, така се истакнаа клучните фактори што ме доведоа до мојата одлука да останам во Европа. Прво и најважно, сакав да останам блиску до моето семејство и да сум на неколку часа лет од дома. Тоа ми обезбедува емоционална сигурност и можност да останам поврзана со најблиските луѓе во мојот живот, без да поминувам долги и скапи патувања (како што би било случајот доколку студирав во САД).

Вториот важен критериум беше самата програма што би ја студирала. Отсекогаш знаев дека сакам да студирам на Правен факултет, а во САД мора прво да се заврши четиригодишна додипломска програма, а потоа уште три години се оди на Правен факултет. За разлика од таму, во Велика Британија правото се изучува како додипломска програма 3 години и специјализација од 1 година. Поради тоа, самото одење во Америка би подразбирало значително подолг и поскап процес на студирање додека не започне мојата кариера. Затоа се одлучив да останам во Европа, со тоа што факултетот ми нуди комбинација од академска ригорозност и практична насоченост во пократок временски период.

2. Како се справуваш со предизвиците на напредното аплицирање и изборот на факултет? Која е твојата најголема мотивација да успееш во овој процес?

Справувањето со предизвиците на напредното аплицирање и изборот на факултет не е лесно: бара многу самодисциплина, истражување и способност да се справам со стресот и со неизвесноста. Секоја апликација беше различна во однос на роковите, форматите на мотивациските писма, дополнителните есеи и критериуми. Но токму таа комплексност ме научи како да бидам организирана, да си ги планирам обврските навреме и да побарам помош.

Најмногу ми помогна тоа што го гледав процесот како личен предизвик, а не само како административна обврска. Се обидував да не се споредувам со другите, туку да го извлечам најдоброто од себе, да раскажам автентична приказна за моите интереси и искуства и да бидам искрена за тоа што навистина барам од факултетот.

Мојата најголема мотивација беше, и сè уште е, желбата да ја реализирам својата визија за иднината. Сакам да студирам право затоа што верувам во правдата, во моќта на аргументот и во можноста преку знаење да се создаде реална промена. Ме мотивира идејата дека со квалитетно образование ќе можам еден ден да бидам глас на оние што немаат можност да се слушнат. Секој чекор во процесот — без разлика колку бил тежок — го гледав како приближување кон таа цел.

3. Со оглед на твојата љубов кон правото и политиката, каде се гледаш по завршувањето на студиите? Која е твојата визија за идната кариера?

По завршувањето на студиите, се гледам како правник што работи во областа на корпоративното право. Многу ме привлекува динамиката на деловниот свет, сложените договори, спојувањата и аквизициите, како и правните прашања поврзани со трговијата, технологијата и регулативите коишто постојано се менуваат. Сакам да бидам дел од средина каде што прецизното правно размислување се среќава со практични деловни одлуки и каде што можам да дадам придонес во решавањето на реалните проблеми на големите компании.

Мојата визија за идната кариера е да бидам правен експерт со силно чувство за етика и интегритет, кој не само што ги разбира правните рамки туку и поширокиот политички и економски контекст во кој функционираат корпорациите. Во долгорочна смисла, би сакала да се вклучам и во креирање политики што се однесуваат на корпоративната одговорност, транспарентноста и одржливоста, со што би ја споила мојата страст за право со интересот за политика и општествен развој.

4. Ти си многу активна во учење преку курсеви и летни школи надвор од училишниот курикулум за време на твоето школување во НОВА. Колку ти помогнаа тие искуства во проширувањето на твојот поглед на правото и на политичките науки за на крај да успееш да бидеш на листата на успешните универзитети?

Искуствата што ги стекнав преку курсеви и летни школи надвор од редовната настава во НОВА одиграа огромна улога во моето академско и лично оформување. Прво, ми помогнаа да изградам дисциплина, бидејќи научив како да работам самостојно, како да поставувам цели и да бидам истрајна во нивното остварување; но и да ја покажам мојата страст и интерес за правото и за политиката додека сум опкружена со луѓе што се еднакво мотивирани. Овие одлики беа особено важни за успешното аплицирање на универзитетите, каде што се бара самостојност и иницијатива.

Второ, тие програми ми дадоа основа во знаењето за правото и за политичките науки. Не само што можев да ги научам концептите подлабоко туку и сфатив дека навистина можам да се замислам како го студирам тоа и како работам во оваа област — дека не ми е само интерес, туку иднина. Тоа чувство на сигурност во мојот избор беше клучно кога аплицирав и го претставував сопствениот профил пред универзитетите.

Дополнително, преку летните школи запознав врсници од целиот свет. Тие ме научија колку е вредно да се споделуваат искуства, да се дебатираат различни гледишта и да се работи во меѓународна средина. Тоа ми помогна да го проширaм мојот светоглед и да го изградам карактерот, додека во исто време станав свесна за областите во кои треба уште да напредувам.

5. Какви се твоите планови и подготовки за аплицирање за добивање владина стипендија? Што би ги советувала твоите врсници, како да дојдат до поголеми успеси и поволности за успешен академски пат?

Моите подготовки за аплицирање за владина стипендија започнаа уште пред самото пријавување преку градење силен академски и воннаставен профил. Истражував кои се критериумите, кои документи се бараат и како најдобро да ја раскажам мојата приказна на начин што ќе покаже зошто токму јас ја заслужувам таа поддршка. Посветив внимание на мотивациското писмо и на сите детали што ја покажуваат мојата посветеност кон образованието и идниот придонес во општеството. Планирам да ја користам оваа можност како начин не само да ја финансирам својата едукација туку и како обврска да се вратам со знаење и искуство што ќе биде корисно и за мојата земја.

На моите врсници би им го советувала следново: не чекајте совршен момент за да почнете, почнете со тоа што го имате. Истражувајте ги можностите, прашувајте ги луѓето и не плашете се од одбивања, затоа што секое искуство ве подготвува за следниот чекор. Изградете портфолио на активности што навистина ве интересираат, не само за да изгледа добро на апликација туку за да развиете вистински вештини и страст. И најважно, бидете автентични. Универзитетите и стипендијалните комисии сакаат да видат кои сте вие, а не совршена верзија на некој друг. Успехот не е само резултат на оценки, туку и на упорност, љубопитност и искрена мотивација.

Спонзорирана објава