На парламентарните избори во Косово, одржани на 14 февруари, партијата на Албин Курти Самоопределување освои убедлива победа. Како што се очекуваше, партијата блиска до властите во Белград, Српската листа, доби најголема поддршка во српските заедници. Сепак, во повеќето од 10-те српски општини, граѓанската иницијатива, бошњачката листа „Обединети заедно“ на Адријана Хоџиќ беше на второто место, поради што реагираше Партијата на косовските Срби која се најде на третото место.

„Во неделата, на 14 февруари 2021 година, бевме сведоци на несовесна кражба на гласови и изборен инженеринг во српските заедници на Косово. Излезноста беше поголеама отколку во Северна Кореја или Белорусија, потврдувајќи и овој пат дека кражбата на гласовите е посилна од „демократските институции на Косово“. Особено загрижува фактот што во српските заедници, огромен број гласови, измерени во илјадници, беа дадени за една не-српска изборна листа (ГИ „Обединети заедно“ – Адријана Хоџиќ)“, соопшти Партијата на косовските Срби на Фејсбук.

Тие велат дека оваа „несовесна кражба“ за која ја обвинуваат Српската листа, како и „подарокот“ на гласовите на Србите на бошњачката листа, е „најголемото предавство на Србите на Косово и зборува за целосно губење на разумот и моралот во „раководството“ на српското раководство.

„Оние кои повеќепати ги прогласија покојниот Оливер Ивановиќ, Александар Јаблановиќ, Слободан Петровиќ, Ненад Рашиќ, Рада Трајковиќ и многу други за предавници без никакви докази, тврдејќи дека овие луѓе ќе ги добијат гласовите на Албанците, што никогаш не се случило никаде. Овој пат тие го направија најголемото предавство на „својот“ народ, давајќи и гласови на Адријана Хоџиќ“, додаваат од оваа партија.

За Хоџиќ се вели дека „ги навредила и измамила сите Бошњаци на Косово прифаќајќи ваква игра на Српската листа и украдени гласови од Србите, од сите оние избирачки места каде што никогаш немало ниту еден Бошњак“.

Од партијата нагласуваат дека „духот од шишето е ослободен“, албанските партии сега „несомнено имаат право да ги имаат своите „српски листи“ на следните избори, на кои ќе им дадат гласови на Албанците и со тоа на крајот ќе ги исфрлат автентичните српски политички партии од политиката.

Тие најавија дека во наредниот период ќе започнат „политичка акција за утврдување на сторителот на оваа изборна кражба во српските заедници“ и побараа брза реакција од надлежните институции. Од партијата исто така повторно го овтораат прашањето на неопходноста на спроведување попис во областите на Косово со српско мнозинство.

„Ајде еднаш и без измами и заблуди да утврдиме колку навистина имаме, а во исто време и колку Бошњаци има во мнозинските српски области“, прецизираат тие.