Папата Франциск ги повика светските лидери кои се состанаа на самитот на ОН за климата COP26 да го слушнат „плачот на Земјата и плачот на сиромашните“.

Папата, кој во својот понтификат се фокусираше на заштитата на животната средина, на неговиот благослов на плоштадот Свети Петар рече дека се надева дека средбата во Глазгов ќе донесе ефективни одговори и ќе понуди конкретна надеж за идните генерации.

Папата постојано ги повикува учесниците на самитот за климата, кој почнува денеска, наместо зборови да преземат соодветни акции.

Во петокот, тој за Би-Би-Си изјави дека средбата се одржува во клучно време поради пандемијата на коронавирусот, климатската криза и проблемите со снабдувањето со храна кои заедно создаваат „совршена бура што го уништува општеството“.

Папата: Време е да се дејствува

Во написот објавен денеска во италијанскиот дневен весник „Il Corriere della Sera“, папата предупреди дека „време е да се дејствува, да се дејствува заедно против климатските промени, пандемијата ковид-19, сиромаштијата…“.

Тој, исто така, ги истакна овие грижи со тоа што ги покани присутните да ја посетат изложбата на плоштадот Свети Петар во врска со неговото еколошко писмо „Лаудато Си“ од 2015 година, чиј автор е фотограф од Бангладеш. Научниците велат дека Земјата ќе биде доста погодена од покачувањето на нивото на морето.

84-годишниот Папа неколку пати изјави дека се надева дека ќе присуствува на самитот COP26, но Ватикан на 8 октомври објави дека неговата делегација ќе ја предводи кардиналот државен секретар Пјетро Паролин.