Организаторот на УС Опен непосредно пред стартот на турнирот кој ќе се игра без публика, денеска го доби првиот тенисер позитивен на коронавирус. Французинот Беноа Пер е позитивен на ковид-19, пренесуваат светските медиуми.

Ова е првиот позитивен случај на коронавирус кај играч кој престојува во „меурот“ на УС Опен, односно е сместен во хотелот резервиран за тенисерите и тенисерките. Пер исто така е прв тенисер кој е позитивен на ковид-19, а досега имаше еден случај на позитивен тест кај помошниот персонал во „меурот“ на УС Опен.

Беноа Пер својот настап на терените на Флешинг Медоуз требаше да го започне во вторник против Полјаков Камил Мајцржак, но тој ќе биде заменет со шпанскиот тенисер Марсел Гранолерс.