23-годишниот жител на Крива Паланка, кој го влечеше кучето со автомобил, јавно се извини за постапката и рече дека воопшто не сакал тоа да се случи. Возачот за здружението „Happy Paws“ објаснува дека немал намера да го повреди ниту да го мачи кучето, туку тоа скокнало од отворениот прозорец на автомобилот, додека го транспортирале во викендичка. Тој тврди дека кучето било вдомено пред еден месец.

„Кучето беше ставено во бажаникот на колата. Го скокна седиштето и се скина ланчето на него. И скокна од прозорот, бев на кривината, не смеев да застанам. И затоа ја намалив брзината, за да ме видат и заобиколат сите, излегов на пошироко за прегледност, го зедов кучето, го подигнав и застанав на страна“, вели тој, иако на снимката од која се откри случајот, се гледа како автомобилот вози со постојана брзина 25 секунди и не изгледа дека возачот има намера набргу да запре.

23-годишното момче е под истрага поради сомнение дека сторило кривично дело „мачење животни“ по член 233 од Кривичниот законик.

„Полициската управа Крива Паланка е известена дека на социјалните мрежи е објавено видео на кое се гледа како во Крива Паланка, куче е врзано за патничко возило во движење и кучето е принудено да се движи. Полициските службеници презедоа соодветни мерки и активности и е утврдено дека сопственик на автомобилот и на кучето е А.А. (23) од Крива Паланка“, велат од Министерството за внатрешни работи(МВР).

„Анима Мунди“ вели дека волонтери од оваа организација веднаш излегле на терен за да ја проверат состојбата на животното, при што пронашле бројни повреди на неговото тело и побарале животното да му се одземе на сопственикот поради тортура.