Необичен инцидент се случил во една холандска зоолошка градина кога падобранец по грешка слетал во кафез со мајмуни, објавија холандските медиуми.

Падобранецот требало да слета на теренот на блискиот фудбалски клуб кој добил нова вештачка подлога и организирал настан по тој повод, но од сè уште непознати причини скршнал од правецот, пренесува „НЛ Тајмс“.

Директорот на Зоолошката градина во градот Рен, Робин де Ланге изјавил дека падобранецот имал среќа, бидејќи доколку се спуштел само 100 метри понатаму, ќе слетал во кафез со лавови или слонови.

Де Ланге планира да се сретне со челниците на фудбалските клубови за да се погрижи такви инциденти да не се повторат.

„Сите бевме исплашени. Ова никогаш повеќе не смее да се случи“, изјавил тој.

Во овој инцидент нема повредени, а истрагата за околностите на случајот е во тек.