Европската полициска агенција Европол соопшти дека во меѓународната операција „Фамилија“ бил разбиен балкански криминален ланец, во кој со приватни авион се префрлувало кокаин од Јужна Америка во Европа.

Повеќе од еден тон кокаин и два милиони евра и луксузни автомобили биле запленети во глобалната операција против шверц на Балканот, соопшти Европол.

Криминалната мрежа е осомничена дека внела дрога во Европа од Јужна Америка во текот на оваа година и лани со приватни авиони. Проценките се дека криминалците доставиле и хероин од Макао и Хонг Конг со бродови.

Европол соопшти дека двајца клучни членови на мрежата се уапсени во Швајцарија и во Хрватска. Шеснаесет апсења се извршени во двете држави, како и во Чешка, Србија и во Хонг Конг.

При претрес во Хрватска, Чешка, Србија, Словенија и Швајцарија полицијата запленила не само кокаин, туку и два милиона евра, како и луксузни стоки вредни над милион евра.

Акцијата била координирана од Европол и од Федералната управа на САД за контрола над наркотици (ДЕА).