Во Клиничката болница во Хрватска во последната недела се извршени трансплантации на 12 органи кај седум приматели, меѓу кои и првата трансплантација на пет органи кај еден пациент, кој добил желудник, тенко и дебело црево, црн дроб и панкреас.

– Овој тип на операција се прави само во 11 европски центри, а годишно се изведуваат 10 такви операции во цела Европа – истакнал директорот на болницата Марио Старешиниќ.

Пациентот кој доби пет органи е роден во 1969 година, добро закрепнува и неговата состојба со недели ќе ја следи тим од лекари: анестезиолози, хирурзи, интернисти, гастроентеролози, нефролози, патолози и радиолози.

Тој боледува од тромбофилија од која имал стомак полн со дебели крвни садови и минимум едно внатрешно крвавење дневно, поради што единствена опција била трансплантацијата.

Оваа операција воедно била и ретрансплантација бидејќи пациентот веќе добил црн дроб во 2023 година.

– Ова е успех на целиот тим. Кога ќе започне трансплантацијата, немате многу време. Сите ние, од возачите кои ги транспортираа органите од Осиек до хирурзите, моравме да бидеме совршено координирани. Успеавме да направиме сè за помалку од шест часа – рекол Стипислав Јадријевиќ, водич на тимот, што ја изврши операцијата пред пет дена.