На 29 март 2022 година во Клиничката болница Тетово се состанала една навидум вообичаена комисија за давање конзилијарни мислења за пациенти. На дневен ред било барањето за давање наод и конзилијарно мислење од повеќе доктори специјалисти, за пациент да добие пари од Центарот за социјални работи за помош и нега од друго лице.

Но, во комисијата имало докторка офталмолог што добро го познавала пациентот бидејќи му била сопруга.

Кривичниот суд во Тетово неодамна ја осуди за несовесно работење во службата откако таа призна вина. Причината е во тоа што таа како дел од комисија, дала мислење и наод дека нејзиниот венчан сопруг има право на надоместок за нега од друго лице во месечна висина од 4.711 денари и тоа од поголем обем, во времетраење од две години, со што на Центарот за социјални работи „му причинила штета од 119 илјади денари“.

Но, потреба од помош и нега од друго лице во поголем обем, има лице со тешка или длабока интелектуална попреченост, лице со потешка или најтешка телесна попреченост, потполно слепо лице и лице со трајни промени во здравствената состојба поради што не може самото да ги задоволува основните активности од секојдневниот живот, не може ниту со помош на ортопедски помагала самостојно да се движи во станот или надвор од станот, самостојно да се храни, облекува, да ја одржува личната хигиена, ниту да ги врши основните физиолошки потреби. Оттаму, од пресудата не е јасно ниту пак со неа е утврдувано како пациентот што го добил наодот за ваква нега би можел да живее без надоместокот што му бил даден.

Од пресудата е јасно само дека докторката не би смеела да биде дел од Комисијата за носење конзилијарни мислења бидејќи пациентот ѝ бил сопруг. На докторката ѝ е утврдена казна затвор во траење од 6 месеци која нема да се изврши ако во рок од една година не стори ново кривично дело.

Центарот за социјални работи пак, кој го исплаќал надоместокот за туѓа нега базирано на ваквото конзилијарно мислење, од страна на судот бил упатен во граѓанска парница. Претставникот на Центарот за социјални работи во судница навел дека бара да се вратат парите.

Обвинетата И.В. по поука за нејзините права како обвинета во постапката изјави дека го разбира обвинението во целост и е повикана да се произнесе за кривичното дело кое ѝ се става на товар, изјави дека се изјаснува за виновна, лично како доктор не ги знае правните работи, но очигледно дека во нејзиното постапување во комисија згрешила ненамерно, пишува во пресудата.

Законот за спречување корупција и судир на интереси предвидува дека службеното лице во своето работење е должно да внимава на потенцијалниот судир на интереси и да преземе мерки за негово одбегнување. Кога постои сомнеж дека има судир на интереси, службеното лице е должно да ги преземе сите мерки да го спречи влијанието на неговиот приватен интерес или приватниот интерес на друго лице, врз извршувањето на неговите овластувања и должности и за тоа да го извести својот претпоставен. Кога службеното лице ќе дознае за околности што укажуваат на постоење на судир на интереси или на потенцијален судир на интереси, е должно веднаш да побара да биде изземено и да запре со своето постапување.