Секогаш проверувајте ги кремовите за сончање пред да ги купите, за подобро да се заштитите од штетните сончеви зраци кои можат да доведат до рак.

Изгорениците од сонце и дехидратацијата се само дел од ризиците од прекумерно изложување на сонце без соодветна заштита. Престојот во ладовина и пиењето многу вода може да помогне, но заштита од сонце е и кремот за сончање со заштитен фактор, односно СПФ фактор, пишува „Мирор“.

Ставањето заштитен фактор е важно за заштита на вашата кожа од штетните УВ-зраци. Изложеноста на УВ-зраци без соодветна заштита од сонце може да резултира со изгореници, топлотен осип, предвремено стареење на кожата и хиперпигментација.

Во некои случаи, изложувањето на УВ-зраци го зголемува ризикот од развој на рак на кожата (меланом).

Кога купувате кремови за сончање, секогаш треба да ги купувате оние со симболот УВА или УВБ на нив. Во кругот треба да има ѕвездички, а бројот на ѕвездички ќе ви го каже нивото на заштита.

Кремовите за сончање се оценети од една до пет ѕвезди врз основа на нивото на заштита што го нудат, при што пет, се разбира, е највисоката заштита.

Што е СПФ?

СПФ го означува степенот на заштита од штетните зраци кои предизвикуваат изгореници. Посебно ја мери ефикасноста на производот во намалувањето на изгорениците на вашата кожа.

Што се УВА-зраци?

УВА-зраците се штетни зраци кои имаат способност да навлезат длабоко во дермисот, слојот на кожата што се наоѓа подлабоко во телото. Овие зраци се постојано присутни во текот на целиот ден и иако не се веднаш видливи, нивното влијание е значајно – можат да продрат низ облаци, па дури и низ стакло.

Познато е дека УВА-зраците продираат во кожата подлабоко од УВБ-зраците, што доведува до долготрајни оштетувања, како што се различни форми на рак на кожата. Тие исто така можат значително да придонесат за процесот на стареење со тоа што предизвикуваат брчки и дамки од сонце.

Што се УВБ-зраци?

УВБ-зраците главно се апсорбираат во епидермисот и горните слоеви на кожата. Овие зраци се одговорни за изгореници и црвенило на кожата. Иако не продираат толку длабоко како УВА-зраците, тие се исто толку штетни. УВБ-зраците значително придонесуваат за развој на рак на кожата, вклучувајќи меланом, а исто така го забрзуваат стареењето на кожата.

Важно е да се напомене дека вооченото ниво на заштита што го обезбедува производот може да измами. На пример, кремот за сончање со низок заштитен фактор може да има повеќе ѕвезди што укажуваат на високо ниво на УВА-заштита. Меѓутоа, тој не е толку прецизен како кремовите кои имаат индицирани фактори на заштита од УВА и УВБ-зрачење.