Иако можеби не е на врвот на листата на омилени јадења, кога е во прашање здравјето на срцето, прокељот заслужува посебно место во чинијата. Кардиологот Карл Лави и диететичарката Елана Наткер се согласуваат дека прокељот често е занемарен, но е исклучително корисен за здравјето.

Зошто прокељот е добар за срцето?

Богат со влакна

Една шолја варен прокељ содржи околу 6 грама влакна, што помагаат во одржувањето на здравото варење, но и го намалува крвниот притисок – благодарение на влијанието на цревните бактерии кои произведуваат корисни масни киселини.

Извор на витамин К

Според диететичарката Елана Наткер, витаминот К игра клучна улога во зачувувањето на здравјето на артериите. Меѓутоа, ако земате средства за разредување на крвта, задолжително консултирајте се со лекар пред да го зголемите внесот.

Природни нитрати

За разлика од штетните нитрати од преработената храна, природните нитрати од зеленчукот како прокељ, го поттикнуваат производството на азотен оксид, соединение кое ги опушта крвните садови и ја подобрува циркулацијата, пишува „Итинг вел“ (EatingWell).

Полн со витамин Ц

Една шолја варен прокељ го обезбедува речиси целиот дневен внес на овој антиоксидант, кој го намалува оксидативниот стрес и го поттикнува здравјето на крвните садови.

Калиум за рамнотежа

Прокељот е и добар извор на калиум, кој помага во регулирањето на крвниот притисок, особено важно во исхраната богата со натриум.

Како да го вклучите во исхраната?

– Печете го во рерна со маслиново масло.
– Додадете го во салати, особено во рендани сирови.
– Испечете го на скара или во фритеза на топол воздух за крцкава верзија.