Големата руска актерска ѕвезда Јуриј Борисов, стана првиот руски актер кој е номиниран за Оскар во последните педесет години за неговата улога во романтичната драма на Шон Бејкер, „Анора“ од 2024 година. Борисов, кој е номиниран за најдобра споредна машка улога, ја игра улогата на Игор – телохранител на синот на рускиот олигарх. Актерот доби номинации и од наградите БАФТА, Златен глобус, Избор на критичарите и САГ наградите.

– Бев во автомобилот со ќерките и сопругата Ана кога ја слушнав веста. Сите врескавме и плачевме. „Анора“ се однесува на поврзаноста меѓу луѓето во однос на менталитетот, националноста и културата. И за време на снимањето чувствував дека сме различни, но во исто време, апсолутно сите сме слични. И така, за мене тоа е врска меѓу душите – рече Борисов, во интервју од Москва.

Иако е голема ѕвезда во Русија, Борисов доби големо меѓународно признание во романтичниот трилер „Куепе бр. 6“ од 2021 година. Филмот освои Гран при во Кан и му донесе номинација за европска филмска награда, сепак 32-годишниот Бориов  откри дека никогаш не планирал да стане актер.

– Кога бев во градинка сакав да бидам астронаут, после тоа сакав да бидам архитект, а потоа новинар. Конечно сфатив дека само сакам да не правам ништо, да го живеам својот живот и да патувам многу. Чувствувам дека глумата не е работа. Сè уште мислам дека не правам ништо со мојот живот.

Режисерот на „Анора“, Шон Бејкер, првпат го видел Борисов на проекцијата на филмот „Купе бр.6“ во Кан во 2021 година.

– Веднаш се вљубив, можев да видам каков неверојатен актер е. Го сакав во мојот филм уште пред да го напишам сценариото за „Анора“. „Неговата глума ја има таа чувствителност, многу од оние емоции кои се кријат зад надворешната обвивка“, додаде американскиот режисер.

Анора“, со Мајки Медисон во главната улога, е првиот филм на Борисов на англиски јазик; пред тоа, тој никогаш порано не бил во Америка.

Борисов остави голем впечаток, крадејќи ги женските срца, во филмот „Сребрени лизгалки“ кој е достапен на Нетфликс.