Анхел Торес, сопственикот и претседател на шпанскиот прволигаш Хетафе, пријатно ги изненади сопствениците на сезонски билети. Торес изјави дека сите 13.500 сопственици на сезонски билети за наредната 2020/21 сезона, билетите  ќе ги добијат бесплатно.

Торес се одлучи на ваков потег за да им ја олесни состојбата на своите навивачи поради прекинот на Ла Лига. Сезоната во Шпанија е во прекин веќе два месеци, а првиот човек на Хетафе сака да ги задржи навивачите на „Алфонсо Перез“ стадионот.

– Следната сезона сите 13.500 сопственици на сезонски билети ќе одат бесплатно на „Алфонсо Перез“. Ништо нема да им наплатиме, ќе им ги понудиме нивните места бесплатно за секој натпревар во Ла Лига. Доколку е потребно сите трошоци ќе ги покријам јас – изјави Торес за радио „Марка“.

Стадионот „Алфонсо Перез“ има капацитет од 17.000 седишта што значи дека во следната сезона Хетафе ќе има максимална поддршка од своите навивачи.