Малите делови кај детските играчки што се продаваат на платформата „Тему“, лесно се одвојуваат од производот, производите за бебиња може да предизвикаат задушување, додека за козметичките производи нема точни информации за состојките, а се нудат и електрични производи што се исклучително опасни по безбедноста на потрошувачите. Ова е само дел од откриените сериозни недостатоци во однос на безбедноста на одредени производи, кои можат да влијаат врз здравјето на луѓето, а за кои се добиени сознанија преку извршените тестирања во последните 15 месеци од потрошувачките организации од Данска, Италија и Обединетото Кралство, кои се членки на Европската потрошувачка организација – БЕУЦ, објави Организацијата на потрошувачи на Македонија.

– Утврдено е дека многу од овие производи не се усогласени со важечкото законодавство на ЕУ и не би требало да бидат понудени на пазарот, додека пак кај некои примероци, ниту еден од тестираните производи не бил усогласен со барањата на законската регулатива. Европската потрошувачка организација БЕУЦ ја повика Европската комисија што побргу да ги заврши своите тековни истраги за „Teму“ со конкретни и ефикасни мерки и да обезбеди сигурност дека сите засегнати онлајн платформи ќе го почитуваат Законот за дигитални услуги (ДСА) и законодавството на ЕУ за заштита на потрошувачите – стои во дописот од БЕУЦ.

Понатаму, се бара да се предложи сеопфатен акционен план во делот на е-трговијата, кој ќе ги опфати сите проблеми со кои се соочуваат потрошувачите на онлајн пазарите, вклучително и јасни правила за одговорност на трговците. Исто така, се бара Европската комисија да соработува со Европскиот парламент и Советот во финализирањето на реформата на царинскиот систем на ЕУ за да се спречи влез на небезбедни производи на европскиот пазар, какo што во моментот е случајот со производите од „Тему“.
Во насока на поголема заштита, во 2024 година БЕУЦ и дел од нејзините членки веќе поднесоа жалба против „Teму“ за повеќекратни прекршувања на Законот за дигитални услуги, вклучувајќи употреба на забранети манипулативни дизајнерски практики и недоволна можност за следење на продавачите што продаваат на платформа. Подетално може да прочитате за извршените тестирања на дел од производите, на следниот линк – https://www.beuc.eu/reports/tests-temu-products-by-consumer-group.