Во југоисточна Кина, научниците открија фосил на птица со големина на препелица која живеела пред околу 150 милиони години за време на периодот Јура, наведувајќи дека овој древен вид птица поседува изненадувачки модерни карактеристики.

Новоидентификуваната птица, наречена „баминорнис зенгенсис“ (Baminornis Zhenghensis), била долга околу 15 сантиметри, анатомски многу понапредна и подобар летач од „архаеоптерикс“ (Archaeopteryx), претходно откриен фосил од периодот Јура, животно со големина на врана, со анатомски карактеристики на птици и влекачи, пренесува „Ројтерс“.

Птицата „баминорнис“ имала скратена опашка како модерните птици, важна аеродинамична иновација која помага да се придвижи центарот на масата на телото напред кон крилјата, се вели во студијата објавена во списанието „Нејчр“ (Nature).

„Птиците еволуирале од мали диносауруси со пердуви. Врз основа на новото откритие, гледаме дека првите птици се појавиле пред 172-164 милиони години, милиони години порано отколку што се верувало“, изјавил палеонтологот Мин Ванг од Институтот за палеонтологија на ‘рбетници и палеоантропологија на Кинеската академија на науките Бамин.