Осуммина маратонци ја продолжуваат традицијата на Охридскиот маратон
Традиција – Во еден момент, традиционалната спортска манифестација која слави 60 години од првото издание, беше откажана но по притисокот од јавноста беше презакажан и ќе го организираат град Охрид и Агенцијата за млади и спорт, а не Пливачката федерација на Македонија.
Со седуммина пливачи и една пливачка, денеска по патеката „Климе Савин“ ќе се одржи традиционалниот Охридски маратон. Стартот на трката е закажан во 10 часот, а пливачите ќе пливаат 25 километри. Македонија ќе биде застапена со двајца пливачи, Евгениј Поп Ацев и Александар Илиевски кои се надеваат на добар пласман.
Препорачано
Покрај Поп Ацев и Илиевски на 35. издание на Охридскиот маратон ќе пливаат и Арне Фурлан Штулар од Словенија, Франческо Фетини од Италија, Матијас Дијас Хернандес од Аргентина, Сидрит Деску и Арион Будима од Косово. Единствена пливачка ќе биде аргентинката Рита Ванеса Гарсија.
Добриот настап на ултраматонот во Лак Сен Жан во Канада на Поп Ацев и на Илиевски им влева надеж за добар пласман. Илиевски трката што се одржа кон крајот на јули ја заврши на третото место, а Поп Ацев беше четврти.
– На Охридскиот маратон ќе пливаме јас и Александар Илиевски. Подготвен сум и се надевам на висок дострел, што подразбира подиум или евентуално највисок пласман. Годинава имав повеќе подеми и падови во формата и тешко ми е да предвидам. Александар е добра форма сезонава. Добар резултат направи во Канада. Подготвен е и може да се очекува добар резултат и од него на Охридскиот маратон – вели Поп Ацев.
Сезонава имаше проблеми со одржувањето на Охридскиот маратон, дури беше откажан во еден момент, но по реакциите во јавноста, сепак беше презакажан. Наместо во последната недела од август, Охрдскиот маратон кој годинава одбележува 60 години од првото издание, ќе се одржи во денеска и поради тоа се пријавени помал број на пливачи.
Организацијата ја презедоа општина Охрид и Агенцијата за млади и спорт. Минатата година, учествуваа 12 пливачи и седум пливачка, а славеа Французите Аксел Рејмонд во машка и Ошан Касињол во женска конкуренција.
– Во мое име и во името на сите охриѓани, упатувам искрена благодарност до сите пливачи кои прифатија да учествуваат на годинешниот пливачки маратон и да го потврдат сјајот на Охридскиот маратон – изјави охридскиот градоначалник Кирил Пецаков.
На Охридскиот маратон кој се одржува од 1962 година, само двајца македонски пливачи победиле во 35. Изданија, тоа се Евгениј Поп Ацев во 2015 година и Томи Стефановски во 2016 година. Во женска конкуреција исто така само две Македонски биле победнички, Атина Бојаџи на првото издание на маратонот во 1962 година и Теодора Раптис во 1992 година.
