Пандемијата на коронавирусот и лошата финансиска состојба ја натера управата на Барселона да стави дури седум играчи на трансфер листата.
Главоболки на челниците на каталонскиот клуб задава и   податокот што во наредната сезона ќе мора да ги намалат трошоците за дури 250 милиони евра за да ја обезбедат ликвидноста.

Поради заканата од банкрот и пандемијата на коронавирусот, на сите фудбалери им се намалени платите за дури 70 проценти се додека не започне да се игра фудбал, а следен чекор ќе биде продажба на дел од играчите, посебно на тие со големи плати и кој имаат мала влијание во играта.

Според  „Марка“, Лионел Меси ја предводи листата на фудбалери кои по никоја цена нема да бидат продадени, а во неа се уште и Марк-Андре тер Штеген, Жерар Пике, Френки де Хонг, Антоан Гризман и Ансу Фати.

Сите останати се наоѓаат на трансфер листата или се нудат на останатите клубови како размена.
Но според медиумите,управата на Барселона планира ова лето по секоја цена да се ослободи од седум фудбалери.

Меѓу нив е Иван Ракитиќ за кого постои огромен интерес од европските гиганти како Јувентус, Рома, ПСЖ, Манчестер јунајтед  како и поранешниот клуб Севиља и сите можат да го добијат доколку платат 20 милиони евра.

Бразилскиот голман Нето минатото лето беше платен 26 милиони евра, но не доби шанса покрај Тер Штеген и ова лето  каталонците ќе се обидат да повратат дел од вложените пари.

Артуро Видал и Жоао Фирпо заедно со Муса Ваг и Жан Клер Тодибо се нудат на екипите како размена за играчи кои ги посакува тренерот Кике Сетиен.

Последни на листата се најскапите засилувања во клупската историја, Фелипе Кутињо и Осман Дембеле кои целосно потфрлија. За Кутињо има голем интерес од англиските екипи, во прв ред Челси.

Колку Барселона погреши со Осман Дембеле кој иако е огромен потенцијал, поради неспортскиот начин на живот и тврдоглавоста во трите сезони колку е на „Камп Ноу“ повеќе беше на листата на повредени играчи отколку на теренот, доказ е сумата која ја бара за неговите услуги.

Каталонците иако платија дури 125 милиони евра за Дембеле, сега го нудат за неверојатни 45 милиони евра.