Кандидатот за градоначалник на Чаир од редовите на ДУИ, Бујар Османи, денеска информираше дека доколку биде изгласан, ќе формира ново комунално претпријатие „За чист Чаир“ за кое ќе се вработат нови 120 хигиеничари со цел ефикасно и квалитетно чистење на општината.

„Валкана општина е огледало на општина што не ги почитува сопствените граѓани. Затоа, денес излегувам со ветување дека од првиот ден ќе формираме посебно претпријатие за чистење на општината, со вработување 120 униформирани хигиеничари, врз основа на јасно дефиниран дневен план, при што Чаир ќе биде поделен на реони и кога луѓето наутро излегуваат од своите домови, првото што ќе го видат ќе бидат токму комуналните работници како го чистат Чаир“, изјави Османи.

Османи беше дециден дека Чаир не смее да остане најзагадената и највалкана општина во Скопје и порача дека е „доста со импровизации и партиски вработувања“ и ги повика сите училишта и организации за започнат со спроведување волонтерски акции за чистење.