На министерскиот годишен собир на ОБСЕ од 29 ноември до 1 декември во Скопје ќе учествуваат 76 делегации од земји членки и партнери на ОБСЕ. Како што соопшти министерот за надворешни работи, Бујар Османи, на денешниот брифинг, во логистика за настанот ќе бидат ангажирани над 200 луѓе, а 200 војници ќе бидат возачи за спроведување на делегациите. Ќе биде обезбеден и чартер-лет од Брисел за Скопје, а некои делегации ќе дојдат со свои авиони. Обезбедено е и сместување на над илјади членови во делегациите во хотелите низ државава.

Одговарајќи на новинарско прашање за тоа колку ќе чини конференцијата, Османи соопшти дека трошоците се дефинирани однапред и при утврдување на буџетот имале идеја колку од прилика ќе бидат трошоците.

– Според искуствата на другите држави, се претпоставуваше дека самата конференција ќе чини околу пет милиони евра. Ние сме далеку под тие средства, но и сега кога говориме со другите држави толку се трошоците. Се движат од пет до осум милиони евра за претседавањето, појасни тој.

Како што рече тој, трошоците за претседавањето со ОБСЕ се на земјата што претседава, а околу половина милион евра во текот на годината ги обезбедува Секретаријатот на ОБСЕ, но главно за настаните што се одржуваат во Виена, Прага, Варшава.

-Кога ќе заврши конференцијата, ќе направиме пресек во однос на сите трошоци што се направени, додаде Османи.

Во однос на возилата, Османи појасни дека сите стандарди се утврдени – тип на возило, марка на возило, простор, број итн.

– Договорот што го постигнавме со рент-а-кар агенцијата е рамковен, како резервен план. Согласно стандардите мора да имаме обезбедено возила за секој министер и за секоја делегација и тоа од денот на доаѓање до денот на заминување. Договорот ја утврдува цената по возило и по ден и во договорот јасно стои дека МНР нема обврска да ги користи сите возила – додаде Османи.

Откако ќе бидат исцрпени сите државни возила, тогаш, како што појасни шефот на дипломатијата, ќе биде ангажирана рент-а-кар агенцијата. Постапката е спроведена на јавен тендер, но имало само една понуда.

Собирот ќе почне со неформална вечера на 29 ноември, а на 30 ноември е формалниот дел со обраќање на министрите.

Османи изјави дека суштински, ова е најголем настан, затоа што ОБСЕ првпат, е во егзистенцијална криза како организација која од 1975 е основана со мисија да ги чува мирот и безбедноста и да менаџира конфликти. Во криза е, додаде тој, зашто на ниско ниво е довербата на земјите членки по агресијата врз Украина.

– Првпат нема претседавач за 2024, а треба две години однапред да се одреди. Поделени се земјите по ова прашање, рече Османи и очекува одлуката да се донесе токму во Скопје. Исто така, организацијата се соочува и со проблемот дека не е одобрен буџет на ОБСЕ.

Одлуката за иднина на ОБСЕ, како што рече, очекува да биде токму во оваа сала и дека собирот е можност за дијалог на министрите на најголемите земји во светот да комуницираат за прашања за регионот на ОБСЕ. Скопје, рече, ќе биде центар на светот.

Водич на ОБСЕ е подготвен за организација на настанот, МНР една и пол година се подготвува.