Османи: Чаир ќе добие виртуелен музеј, нови фестивали и културен центар
Кандидатот за градоначалник на Чаир, Бујар Османи, тврди дека неговата програма предвидува ревитализација на Чаршијата со обновени фасади, калдрма и осветлување, отворање Културен центар и поддршка на занаетчиството и туризмот преку настани, субвенции и преку промоција на локалната гастрономија.
Кандидатот за градоначалник на Општина Чаир, Бујар Османи, денеска го претстави својот проект „Чаир, Културен центар на Скопје“, чијашто цел е Чаир да стане културна престолнина на градот и симбол на мултикултурализмот, традицијата и на современото творештво, соопшти ДУИ.
Препорачано
– Ова не е трошок, туку најголемата инвестиција во иднината на Чаир и на целото Скопје – истакна Османи.
Програмата предвидува ревитализација на Чаршијата преку обновување на фасадите, калдрмата и осветлувањето, како и создавање Културен центар со изложби, занаетчиски работилници и туристички активности. Во рамки на проектот се планира и организација на „Денови на Балканските чаршии“, со учество на градови од регионот како Призрен, Ѓаковица, Шкодра, Гирокастра, Мостар и Сараево. Посебно внимание ќе биде посветено на поддршка на занаетчиите и развојот на туризмот, преку субвенции, брендирање традиционални производи и промоција на локалната гастрономија, се наведува во соопштението на партијата.
Културниот живот во Чаир ќе се збогати со нови фестивали и настани, се додава, меѓу кои и „Doku n’Shkup“, два месеца исполнети со филм, музика и култура, како и фолклорен фестивал за учениците од општината. Воедно, проектот предвидува и инвестиции во младите преку стипендии за талентирани ученици и студенти, субвенции за музички инструменти, модерно опремени кабинети по музика и изградба на современа читалница достапна за сите граѓани.
Како новитет, ќе се воспостави Виртуелен музеј на Чаир, дигитална архива со историја, фотографии и лични сеќавања на жителите, кој ќе овозможи зачувување и достапност на културното наследство, се вели во соопштението на ДУИ и се додава дека во план е и изградба на современ и инклузивен објект со сали за театар, концерти, изложби и за младински активности.
– Чаир има потенцијал да биде не само општина, туку и симбол на културната ренесанса на Скопје. Ќе инвестираме во културата, уметноста и младите, затоа што тие се гаранција за иднината. Со „Чаир, Културен центар на Скопје“ ќе изградиме средина каде што традицијата и современоста ќе се спојат во едно – порача Бујар Османи.
Со овој проект, Чаир ќе стане живо срце на културниот живот на Скопје, место каде што историјата, современоста и иднината ќе се сретнуваат и ќе отвораат нови перспективи.
