До Центарот за управување со кризи сè уште пристигнуваат пријави за оштетени автомобили и поплавени објекти по вчерашното невреме.

На Единствениот број за итни случаи 112 во 03:22 часот е добиена пријава за паднато дрво врз три возила и на коловоз на улицата „Разловечко востание“ бр. 16 во општина Карпош, а утринава во 06:09 часот е добиена уште една пријава за оштетен автомобил на истата улица бр. 12.

Од Регионалниот ЦУК Скопје е информирано за интервенција до надлежните служби.

Добиена е и пријава за причинета материјална штета во погонот на компанијата „Ла пласт“.

-Според пријавувачот, најверојатно постои проблем со атмосферската канализација или пак е пукната цевка, при што водата тече по улица и се слева во неговите погони. Во моментот објектот се наоѓа поплавен до 50 сантиметри под вода. РЦУК Скопје ги извести надлежните служби за интервенирање според пријавениот итен случај, информираат од ЦУК.

До ЦУК е пристигната и информација за одрон на патот Прилеп кон Кавадарци односно меѓу тунелот и селото Дреново. Одронот е на двете коловозни ленти. Известени се надлежните служби кои информирале дека итно ќе испратат екипа на терен.