Орките познати и како китови-убијци, успеале да потонат едрилица што пловела меѓу Шпанија и Мароко, што е последен во серијата напади на чамци кои започнале од летото 2020 година. Едрилицата „Гразие Мама 2“ потонала за време на спасувањето на екипажот во Гибралтарскиот теснец на 31 октомври, објави полската компанија Морски Мајл на социјалните мрежи.

Таа компанија специјализирана за туристички патувања го објави потонувањето на бродот во овие води поради нападот од орки.

„Едрилицата беше нападната од неколку орки. Тие 45 минути удираа во бродот, предизвикувајќи сериозна штета и дупки“, објавија од Морски Мајл.

Капетанот на едрилицата потоа ја повикал спасувачката служба.

„Капетанот, екипажот, спасувачката служба и членовите на мароканската морнарица се обидоа да ја влечат оштетената едрилица до пристаништето Тангер Мед, но таа потона“, додаваат од компанијата.

Екипажот на едрилицата неповреден и здрав се врати во Шпанија. Ваквото однесување на орките е засилено од летото 2020 година во водите на Шпанија и Португалија, а научниците се обидуваат да го објаснат овој феномен.

Ева Кјара Карпинели, претседател на здружението Нереиде, кое го следи движењето на орките и китовите при преминот од Средоземното Море во Атлантскиот Океан, вели дека орките не ги напаѓаат луѓето.

„Тоа се случи само кога луѓето сакаа да им ја одземат слободата, кога се обидоа да ги фатат“, забележува Карпинели во шпанскиот крајбрежен град Тарифа, каде често пливаат орки.

Орките мигрираат минувајќи низ тамошните води, каде во последните години има зголемен број на бродски сообраќај.

„Бродовите што поминуваат, кои не ја почитуваат оддалеченоста од орките и ги вознемируваат, претставуваат опасност за овие животни“, забележува Карпинели.

Во Шпанија, неопходно е да се усогласат со законската регулатива за пристап. Здружението Нереиде се грижи за заштита на животната средина, за зачувување на животинските и растителните видови таму и ги учи децата за тоа во училиштата.

„Најголемата опасност за орките, како и сите китови, е загадувањето на морето, климатските промени, поморскиот сообраќај и нивното заловување“, предупредува Карпинели.

Морскиот биолог Бруно Дијаз, директор на истражувачки центар во северниот град Понтеведра, вели дека орките понекогаш едноставно си играат.

„Тие се забавуваат на сметка на екипажот на едрилицата. Кормилото се движи, па најмногу привлекува внимание под морето. Затоа е најинтересно и најдостапно за орките за време на нивната забава, која завршува со кршење на кормилото” објаснува тој.

Едрилиците во многу случаи имале скршени кормила. СИРСЕ, организација за проучување и информации за китовите, работи со шпанското Министерство за еколошка транзиција на орките.

Оваа организација собира податоци за движењето на орките и објавува мапа секоја недела, која потоа се доставува до морнарите за да се намали ризикот од средба со нив.