Канадските пожарникари сметаат дека шумскиот пожар што избувна во западна Канада е предизвикан од орел кој го испуштил својот улов – риба – врз високонапонски далновод, објави АП.

Пожарот започнал на 30 јули, околу шест километри јужно од градот Ашкрофт во покраината Британска Колумбија, а истрагата води до необичен заклучок – орел кој летајќи со својот плен се заморил и ја испуштил рибата врз далноводите, што довело до искрење и пожар.

Фотографии од местото на настанот покажуваат јагленисани риби на поцрнета земја, што дополнително ги поткрепува сомнежите на истражителите.

Пожарот избувнал на локација околу три километри западно од најблиската река, што укажува дека рибата најверојатно била донесена оддалеку.