Унгарскиот премиер Виктор Орбан смета дека срамно е што процесот на зачленување на Македонија во Европската унија оди бавно. Орбан истакна дека посетата на македонската владина делегација на Унгарија се случува во важен момент кога три години живееме во сенката на војната.

Орбан посочи дека го информирал Мицкоски дека Унгарија диктатот од ЕУ нема никогаш да го прифати и затоа мора да плаќаат казни.

„Можете да сметате на нашата поддршка во процесот на зачленување на Македонија во ЕУ не само затоа што е срамно што овој процес бавно оди напред, а за тоа не е одговорна Македонија, туку ние членките на ЕУ. Покрај тоа, ние нивното членство го поддржуваме, ЕУ мора да биде поконкурентна во светот и не гледам друго решение за подобрување на конкурентноста, освен продолжување на процесот на проширувањето. Секое проширување досега ѝ донесе добро на Европската Унија“, истакна Орбан.